Доўгі шлях | Славамір Равіч

Гэтая кніга стала бестсэлерам і была перакладзеная на 25 моў свету, паводле яе «Галівуд» зняў блокбастер «The Way Back»!
І вось яна на беларускай мове — Славамір Равіч «Доўгі шлях»!

Восенню 1939 года малады паручнік польскай кавалерыі Славамір Равіч трапляе ў самае пекла пачатку Другой сусветнай вайны. Пасля паразы польскага войска ён вяртаецца ў родны Пінск, дзе яго ўжо чакаюць каты з НКУС. Маладога афіцэра дапытваюць у вязніцах Мінска, Харкава і Лубянкі, пасля чаго ссылаюць на 25 гадоў прымусовых працаў у сібірскі лагер № 303. Але Славамір і не падумаў здавацца.

Разам з групай паплечнікаў адважыўся на ўцёкі. Знаходзячыся ў Якуціі, уцекачы выбралі маршрут на поўдзень. Выкарыстаўшы Байкал як прыродны ўказальнік некалькі тыдняў хутка і настойліва ішлі наперад. Дасягнулі Манголіі, затым накіраваліся на Тыбет. Падарожнік узгадвае, што падарожжа праз унутраную Манголію складалася на самай справе з пераходаў па невыноснай спёцы ад адной ракі да другой і фарсавання гэтых рэк. Славамір Равіч дэтальна апісвае жыхароў гэтых месц. Падрабязна апісвае ўраджэнец Пінска і пустыню Гобі. У Гімалаях падарожнікі аказаліся пад канец сакавіка 1942 года, цераз год пасля ўцёкаў з сібірскага лагера. Славамір Равіч пазней распавёў, што сустракаў у гарах снежнага чалавека.

Кнігу Славаміра Равіча «Доўгі шлях» запісаў англійскі журналіст Рональд Даўнінг. Яе пераклалі на 25 моў, агульны тыраж кнігі склаў паўмільёна экзэмпляраў. На беларускую мову пераклаў Віталь Абрамовіч.