Дзевяноста пяты | Сяргей Навумчык

У 1995 годзе ў Беларусі прайшоў першы рэферэндум, які зліквідаваў статус нацыянальных сымбаляў як дзяржаўных, загнаў мову ў гета, прывязаў краіну да Расеі, а прэзідэнту адчыніў дзверы да неабмежаванай улады.

Сяргей Навумчык нарадзіўся ў 1961 годзе ў Паставах. У 1964-м з бацькамі пераехаў у Віцебск. Скончыў факультэт журналістыкі БДУ, служыў у войску, працаваў у віцебскай абласной газеце. Публікаваў артыкулы ў абарону архітэктурнай спадчыны Віцебску. У 1988-м быў ініцыятарам грамадзкай кампаніі супраць будаўніцтва Віцебскай АЭС, удзельнічаў ва ўстаноўчым сходзе таварыства «Мартыралёг» і Беларускага Народнага Фронту 19 кастрычніка 1988 г.
З сакавіка 1990 па студзень 1996 г. – дэпутат Вярхоўнага Савету Беларусі 12-га склікання, каардынатар парламенцкай апазіцыі БНФ. Удзельнічаў у распрацоўцы і прыняцці Дэкларацыі аб дзяржаўным суверэнітэце Беларусі, падрыхтоўцы законапраектаў да нечарговай сесіі ВС 24–25 жніўня 1991 г., на якой была адноўленая Незалежнасць Беларусі. Аўтар шэрагу законапраектаў. Удзельнічаў у галадоўцы дэпутатаў Апазыцыі БНФ 11–12 красавіка 1995 г. супраць ініцыяванага Лукашэнкам так званага рэферэндуму аб ліквідацыі статусу беларускай мовы як адзінай дзяржаўнай, пазбаўленні герба Пагоня і бел-чырвона-белага сцяга статусу дзяржаўных сымбаляў, эканамічнай інтэграцыі з Расеяй і праве прэзідэнта распускаць парламент. Быў адным з заснавальнікаў Беларускай асацыяцыі журналістаў і Беларускага Хэльсінскага камітэту.
У 1996-м атрымаў палітычны прытулак у ЗША. З 1999 па 2024 – супрацоўнік Радыё Свабода. Сябра Рады БНР і Беларускага ПЭНу, лаўрэат літаратурнай прэміі імя Алеся Адамовіча. У серыі «Бібліятэка Свабоды. XXI стагоддзе» выдаў некалькі кніг пра найноўшую гісторыю Беларусі.