ЗМЕСТ
РАЗДЗЕЛ 1. Рэгістрацыя і першыя крокі
РАЗДЗЕЛ 2. Плацяжы і вывад сродкаў
РАЗДЗЕЛ 3. Наладжванне дастаўкі
РАЗДЗЕЛ 1. РЭГІСТРАЦЫЯ І ПЕРШЫЯ КРОКІ
Хто можа стаць прадаўцом
Згодна з Правіламі для прадаўцоў, прадаўцамі могуць быць як фізічныя, так і юрыдычныя асобы, пры ўмове, што яны:
знаходзяцца ў адной з наступных краін: Аўстрыя, Балгарыя, Бельгія, Вялікабрытанія, Венгрыя, Германія, Грэцыя, Данія, Ірландыя, Іспанія, Італія, Кіпр, Латвія, Літва, Ліхтэнштэйн, Люксембург, Мальта, Нарвегія, Нідэрланды, Партугалія, Польшча, Румынія, Славакія, Славенія, Фінляндыя, Францыя, Харватыя, Чэхія, Швейцарыя, Швецыя, Эстонія;
прапануюць тавары, звязаныя з беларускай тэматыкай, змяшчаюць беларускую мову, сімволіку ці вырабленыя беларускімі майстрамі і прыватнымі кампаніямі.
Як зарэгістравацца
Перайдзіце на хатнюю старонку маркетплэйса і пстрыкніце «Уваход/Рэгістрацыя» → «Стварыць конт». Запоўніце форму рэгістрацыі, адзначыўшы «Я прадавец».
Працэс спраўджання
Для забеспячэння даверу, бяспекі і адпаведнасці заканадаўству, прадаўцы павінны прайсці працэс спраўджання. Ён уключае:
Абавязковае спраўджанне пасведчання асобы (фатаграфія або скан старонак, дзе выразна бачныя звесткі і фатаграфія).
Дадатковыя (неабавязковыя) спраўджанні, якія могуць падвысіць узровень даверу да вашай крамы:
Пацверджанне адрасу (напрыклад, рахункі за камунальныя паслугі);
Спраўджанне нумара тэлефона;
Спраўджанне кампаніі (для юрыдычных асоб).
Пасля праверкі дакументаў ваш конт атрымлівае пашыраныя правы прадаўца і магчымасць дадаваць тавары. Праверка звычайна займае некалькі гадзін.
Запаўненне профілю прадаўца
Пасля паспяховай рэгістрацыі перайдзіце ў «Мой конт» → «Панэль кіравання прадаўца» → «Налады» → «Крама». Укладка «Крама» дазваляе запампаваць банер і лагатып, пазначыць назву вашай крамы, кантактныя і юрыдычныя звесткі. Адзначаючы сваё месцазнаходжанне на мапе, вы даяце дадатковую магчымасць кліентам з вашай мясцовасці знаходзіць і выбіраць вашу краму.
⚠️Сачыце за дакладнасцю усіх уведзеных звестак — любыя недакладнасці могуць прывесці да блакавання конта.
РАЗДЗЕЛ 2. ПЛАЦЯЖЫ І ВЫВАД СРОДКАЎ
Вывад сродкаў – гэта працэс пераводу грошай, якія вы зарабілі на маркетплейсе, на ваш банкаўскі рахунак або плацежную сістэму. Вывад заробленых сродкаў адбываецца аўтаматычна, праз міжнародную плацежную сістэму Stripe, таму спачатку вам неабходна наладзіць Stripe і злучыць з ім ваш конт на маркетплэйсе.
⚠️Звярніце ўвагу: пакуль плацежная іфармацыя не наладжана, купіць ваш тавар будзе немагчыма.
Як злучыцца са Stripe Express
Перайдзіце ў «Панэль кіравання прадаўца» → «Налады» → «Плацяжы» → «Дадаць спосаб аплаты» → «Накіраваць на Stripe».
Пстрыкніце «Злучыць са Stripe».
Увядзіце свой нумар мабільнага тэлефона, электронную пошту, выберыце тып бізнесу і дадайце персанальныя звесткі.
Пасля ўсіх этапаў рэгістрацыі, вы аўтаматычна вернецеся ў сваю панэль кіравання.
Вывад сродкаў
Цяпер усе заробленныя грошы за кожную выкананую замову будуць аўтаматычна пералічаны ў ваш конт Stripe. Яны з'явяцца на вашым балансе калі замова будзе мець статус «Выканана» (калі пакупнік атрымае свой тавар).
Асноўная валюта сайта – еўра. Цану тавара вы задаяце ў еўра, але да Stripe можна падключаць рахункі ў любых працоўных валютах сайта: EUR, USD, PLN, CHF, CZK, DKK, GBP, HUF, NOK, SEK. Вы можаце дадаць і некалькі банкаўскіх рахункаў у розных валютах.
Калі пакупнік купляе тавар у валюце, адрознай ад валюты вашага рахунку, грошы аўтаматычна канверсуюцца. За канверсаванне Stripe можа здымаць камісію (звычайна ад 2% да 4%).
⚠️ Звярніце ўвагу: камісія за продаж вызначаецца Тарыфамі для прадаўцоў.
Справаздачы
Сачыць за сваім прыбыткам і вывадам сродкаў можна ня толькі ў Stripe, але і ў пашыраным выглядзе ў радзеле «Справаздачы» вашай панэлі кіравання.
Адваротны вывад сродкаў
Калі вы карысталіся дадатковымі паслугамі маркетплэйса, напрыклад рэкламай, рахунак будзе выстаўляцца ў 1-ы дзень кожнага месяца. Маркетплейс абавязкова апавясціць вас.
Каб знайсці звесткі пра неабходныя выплаты, перайдзіце ў раздзел «Мой конт» → «Панэль кіравання прадаўца» → «Адваротны вывад сродкаў».
РАЗДЗЕЛ 3. НАЛАДЖВАННЕ ДАСТАЎКІ
Правільнае наладжванне дастаўкі – ключавы аспект поспеху вашага бізнесу: гэта інфармацыя, якая дапамагае пакупнікам зрабіць абгрунтаваны выбар і павышае давер да крамы.
⚠️Звярніце ўвагу: пакуль дастаўка не наладжана, купіць ваш тавар будзе немагчыма.
Выбар зоны і наладжванне спосабу дастаўкі
Для наладжвання дастаўкі, перайдзіце ў раздзел «Мой конт» → «Панэль кіравання прадаўца» → «Налады» → «Дастаўка».
Маркетплэйс прапануе наладжваць дастаўку па зонах. Для зручнасці, перадвызначаны розныя зоны:
Мясцовая
Унутры краіны
Еўропа
Паўночная Амерыка
Паўднёвая Амерыка
і іншыя
Звярніце ўвагу, што Вы можаце скарыстацца зонай «Месцазнаходжанні, якія не ахопліваюцца вашымі іншымі зонамі», калі хочаце наладзіць агульныя спосабы дастаўкі адразу для ўсіх рэгіёнаў ці для рэгіёнаў, не наладжаных раней.
Для кожнай зоны вы можаце выбраць розныя спосабы дастаўкі і, адпаведна, розныя сістэмы разліку коштаў.
Выберыце зону і пстрыкніце «Рэдагаваць» ці «Дадаць спосаб дастаўкі».
Далей, у залежнасці ад зоны, выберыце краіну(-ы), вобласці, альбо абмяжуйце рэгіёны паштовымі індэксамі.
Як выкарыстоўваць паштовыя індэксы для абмежавання зоны дастаўкі
Зона дастаўкі можа змяшчаць адзін або некалькі (па адным на радок) з наступных варыянтаў: канкрэтныя паштовыя індэксы, лічбавыя дыяпазоны (напрыклад, 90210…99000), а таксама індэксы з выкарыстаннем сімвала (*).Сімвал (*) дазваляе ахапіць усе індэксы, якія пачынаюцца з пэўнай паслядоўнасці.
Прыклад:
– 902* ахоплівае 90210, а таксама 90288-1234.Выкарыстанне сімвала (*) у лічбавых дыяпазонах (напрыклад, 90210…99000) не падтрымліваецца.
Потым пстрыкніце «+ Дадаць спосаб дастаўкі» і ў выплыўным акне выберыце спосаб дастаўкі, адпаведны зоне.
Прыклад наладжвання
Зона «Мясцовая»:
Для пакупнікоў з вашай вобласці вы прапаноўваеце самавываз і бясплатную дастаўку. Дадайце адпаведныя спосабы ў зону «Мясцовая» («Лакальны самавываз» і «Бясплатная дастаўка»).
Для кожнага пазначце адпаведную назву («Загаловак спосабу») – напрыклад «Самавываз у Кёльне (Bevingsweg 2, з 9:00 да 22:00)» і «Бясплатная дастаўка (2-3 дні)». Назва будзе бачная пакупнікам падчас афармлення замовы.
Зона «Еўропа 1»
У гэтай зоне вы вырашылі усталяваць расцэнкі для ўсіх краін Еўрасаюза. У спісе краін выберыце патрэбныя і дадайце спосаб дастаўкі «Адзіная стаўка». У наладах спосабу можна наладзіць розныя умовы і кошты для розных тыпаў (класаў) тавараў. Пстрыкніце «Рэдагаваць» пад абранай назвай спосабу для наладжвання.
Адпраўляеце тавары вы, напрыклад, праз DHL – так і пазначце ў загалоўку. Ваша крама прадае кнігі, напрыклад, і карціны, таму вы самі для сябе вызначаеце, што кнігі ў вас будуць адносіцца да невялікіх рэчаў, а карціны - да каштоўных (бо акрамя вялікіх памераў, уключае і кошт страхоўкі). Для класа дастаўкі «маленькая рэч» вы вызначаеце кошт 6.49 еўра. Для класа «каштоўная рэч» – 44,49 еўра.
⚠️ Для кожнай зоны можна дадаваць неабмежаваную колькасць спосабаў дастаўкі з рознымі ўмовамі, рэдагаваць іх і выдаляць.
Напрыклад, вы прапаноўваеце пакупнікам у гэтым жа рэгіёне яшчэ і экспрэс-дастаўку. Напрыклад «DHL International Express (2-3 працоўныя дні)» з вышэйшай цаной.
Зона «Месцазнаходжанні, якія не ахопліваюцца вашымі іншымі зонамі»
Для ўсіх іншых краін, якія не ўваходзяць у наладжаныя вышэй зоны, вы хочаце зрабіць адзіную стаўку. Таму дадайце для зоны «Месцазнаходжанні, якія не ахопліваюцца вашымі іншымі зонамі» спосаб «Адзіная стаўка», пазначце загаловак, напрыклад, “DHL International (7-12 працоўных дзён)” і прапішыце стаўкі.
У выніку вось, як будзе выглядаць выбар спосабу дастаўкі ў пакупніка з вашага рэгіёну (Кёльн):
Так будзе выглядаць выбар спосабу дастаўкі для пакупніка з краіны ЕС:
А так ва ўсіх іншых краінах:
⚠️ Звярніце ўвагу, што класы дастаўкі не будуць ужывацца, пакуль вы не прызначыце іх таварам (у раздзеле «Рэдагаваць тавар»).
Калі вам не хапае нейкага дадатковага класа тавару, няма вашай вобласці ці горада, звяжыцеся, калі ласка, з намі ([email protected]).
Дадаванне палітыкі дастаўкі
Вы можаце дадаць сваю палітыку дастаўкі. Яна можа ўключаць:
Час апрацоўкі: колькі часу патрабуецца для апрацоўкі замоў перад адпраўкай;
Умовы дастаўкі: як і калі адбываецца дастаўка, якія службы дастаўкі выкарыстоўваюцца;
Умовы вяртання: правілы і тэрміны для вяртання тавараў. Звярніце ўвагу, калі вы не прапішыце свае ўмовы, то дзейнічаюць умовы нашага маркетплэйса.
Каб дадаць палітыку дастаўкі, у раздзеле «Дастаўка» → «Пстрыкніце тут, каб дадаць палітыку дастаўкі».
РАЗДЗЕЛ 4. ДАДАВАННЕ ТАВАРАЎ
Варыянты дадавання
Па аднаму
Падыходзіць для невялікай колькасці тавараў ці калі яшчэ няма базы сваіх тавараў. Проста запоўніце форму дадавання тавару ў панэлі кіравання прадаўца.Імпартаваць масава
Праз CSV ці TXT файлы. Зручна для вялікага асартыменту ці тавараў, апублікаваных на іншых платформах ці ўласным сайце.Дубляванне
Калі такі ж тавар ужо прадаецца на маркетплэйсе іншымі прадаўцамі, вы можаце скарыстацца функцыяй дублявання. Гэта дазваляе капіяваць асноўныя звесткі тавару і змяняць толькі неабходныя дэталі, напрыклад цану і наяўнасць.
Для дадавання тавараў перайдзіце ў «Мой конт» → «Панэль кіравання прадаўца» → «Тавары».
Абавязковыя звесткі аб тавары
Пры дадаванні тавара неабходна падаць наступныя звесткі:
Загаловак тавару: дакладны і апісальны.
Тып тавару: для большасці выпадкаў пасуе «Просты» тып, але ў выпадку калі тавар мае некалькі характарыстык, (напр. некалькі варыянтаў колеру, ці некалькі памераў), то выбірайце «Варыянтны». «Згрупаваны тавар» - калі вы маеце некалькі звязаных тавараў, якія дапаўняюць адно аднаго (напр. розныя тамы кнігі)
Цана: у еўра.
Катэгорыя: выберыце найбольш адпаведную катэгорыю для вашага тавару.
Фотаздымкі: запампуйце якасныя здымкі і малюнкі (мінімум адзін).
Апісанне:
«Кароткае апісанне» - абавязковае, яно паказваецца ў асноўнай частцы тавару, побач са здымкамі, коштамі і кнопкай дадавання ў кошык. Апішыце асноўныя характарыстыкі, перавагі і інш. Раздзел «Апісанне» - гэта неабавязковае разгорнутае апісанне, якое паказваецца асобнай укладкай у ніжняй частцы карткі тавару.Дастаўка і падатак: выберыце свой падатковы клас і клас дастаўкі (гл. раздзел «Наладжванне дастаўкі».
Атрыбуты: Дадайце характырыстыкі тавару (напр. колер, колькасць старонак і г.д.). Калі вы адзначаеце характарыстыкі ў гэтых палях, асноўныя з іх аўтаматычна трапляюць у фільтры крамы. Гэта значна палягчае пакупнікам пошук патрэбных тавараў на сайце. Калі няма пэўнага атрыбута ці значэння, вы можаце дадаць свой варыянт.
⚠️ Звярніце ўвагу, што беларуская мова першасная і абавязковая. Калі тавар не мае беларускай версіі, ён не будзе апублікаваны.
Калі вы хочаце дадаць версіі на іншай мове (рускай або англійскай), звяжыцеся з нашай камандай (мы працуем над аўтаматызацыяй гэтай фунцыянальнасці).
Патрабаванні да якасці здымкаў тавару
Прапорцыя 5:6, вертыкальны
Разрозненне: не менш за 1000х1200 пікселяў. Ідэальна 1920х2304
Памер: да 1 мб
Фармат: JPEG
Чыстасць і выразнасць: без шумоў і размыццяў
Alt-тэкст: пазначце альтэрнатыўны тэкст для кожнай выявы, напрыклад, "кофта з доўгімі рукавамі". Гэта дапамагае пошукавым сістэмам лепш разумець змест малюнка, паляпшаючы прасоўванне вашага тавару, і забяспечвае доступнасць кантэнту для карыстальнікаў з абмежаваным зрокам, якія выкарыстоўваюць экранныя чытальнікі.
Мадэрацыя і публікацыя
Пасля дадавання тавараў яны праходзяць мадэрацыю адміністратарам маркетплейсу. Каб сачыць за статусам мадэрацыі і публікацыі вашых тавараў, перайдзіце ў «Мой конт» → «Панэль кіравання прадаўца» → «Тавары».
Дакладнае і якаснае афармленне тавару павялічвае шанец, што ў будучыні тавары вашай крамы будуць публікавацца аўтаматычна, без мадэрацыі.
На гэтым усё. Спадзяёмся, што гэты артыкул дапаможа хутка пачаць працу на нашым маркетплэйсе! Калі ёсць пытанні, удакладненні ці хацелі в атрымаць інструкцыі па іншым тэмам — звяртайцеся ў службу падтрымкі.
